Олунньу 19, 20 күннэригэр Сэһэн Ардьакыап аатынан улуус историятын, Кулантай аатынан уран тыл уонна И.П. Готовцев аатынан Танда түмэллэригэр история билимин кандидата Афанасий Алексеевич Николаев нэһилиэнньэҕэ, оскуола үөрэнээччилэригэр анаан лекциялары аахта. Көрсүһүүгэ саха норуотун төрдүн-ууһун туһунан сонун этиилэр, А.Е. Кулаковскай – Өксөкүлээх Өлөксөй инникини өтө көрүүтэ, сабаҕалааһыннара, саха тылын төрдө, саха норуота дойдубут сайдыытыгар оруола о.д.а. темалар таарылыннылар. Афанасий Николаев Саха сирин улуустарын Ытык кэрэ сирдэринэн туризм сайдыыта улахан суолталааҕын бэлиэтээтэ. Патриотизм үөскээһинэ историяны билииттэн, үөрэтииттэн тахсарын өйдүөх тустаахпыт. Лекция кэмигэр Афанасий Николаев кинигэлэрэ атыыланнылар, кэлбит дьон норуоппут инники сайдыытын туһунан элбэҕи торумнастылар.
