Бүгүн улуус түмэлигэр кыраайы үөрэтээччилэр, историктар төгүрүк остуоллара ыытылынна. ТэрээҺиҥҥэ история билимин кандидата Афанасий Алексеевич Николаев, СӨ уус-уран оҥоҺукка маастара, Россия суруналыыстарын сойууҺун чилиэнэ Аржаков Николай Николаевич — Боло Уус, Арчы Дьиэтин фольклорнай коллективын салайааччыта Павлова Евдокия Ивановна, «Ньурба улууҺун култууратын сайдыытыгар кылаатын иҺин» бэлиэ хаҺаайына, ветеран учуутал Сухаринова Валентина Егоровна кыттыыны ыллылар. Ол курдук, түмэл дириэктэрэ Павел Васильевич Пермяков улууспут иҺигэр ыытыллыахтаах кыраайы үөрэтэр экспедиция бырайыагын билиҺиннэрдэ. Кыттыыны ыла кэлбит дьон улууска научнай экспедициялар ыытыллалларыгар сөптөөх туох үлэ барыахтааҕын туҺунан, улуус түҥ былыргы историятын үөрэтии, чинчийии, кэлэр көлүөнэ ыччакка тиэрдии, топонимиканы үөрэтии курдук боппуруостар тула бэйэлэрин санааларын, этиилэрин үллэҺиннилэр.
Афанасий Алексеевич «Сакральная Якутия» диэн бырайыак туҺунан сырдатта, ону таҺынан Ытык сирдэри үйэтитэр, хараанныыр сыаллаах үлэни хайдах ыытарга бэйэтин көрүүлэрин, сүбэлэрин үллэҺиннэ. Үлэ үөҺүгэр сылдьар энтузиаст дьоммут Акулина Степановна Сокольникова уонна Геннадий Дмитриевич Пестряков оҕолорго аналлаах экспедицияларын туҺунан кэпсээтилэр. Кыраайы үөрэтээччи Роман Яковлевич Бережнев Танда, Түүлээх хайысхатынан барар экспедиционнай маршрутун бары сэҥээрдилэр, ыкса үлэлэҺэр туҺунан сөбүлэҥнэрин эттилэр. Төгүрүк остуол түмүгүнэн резолюция ылылынна, улуустааҕы кыраайы үөрэтээччилэр холбоҺуктарын салайааччытынан улуустааҕы үөрэх салалтатын начальнига Литвинцев Степан Моисеевич бигэргэннэ.