Олунньу 8 күнүгэр улуус түмэлигэр «Өбүгэлэрбит суолларынан» бырайыак тула кэпсэтии ыытылынна. Тэрээһиҥҥэ улуус баһылыга Аммосов Василий Иванович, култуура салалтатын начальнига Нафанаилов Сергей Сергеевич, ыҥырыылаах ыалдьыттар: историк, ХИФУ Сурук-бичик түмэлин директора Мигалкин Афанасий Васильевич, СӨ Национальнай архыыбын директора Румянцев Петр Васильевич, Түүлээх нэһилиэгин баһылыга Винокуров Станислав Викторович, улууспут кыраайы үөрэтээччилэрэ кыттыыны ыллылар. Улуус баһылыга Василий Иванович уус алданнар дириҥ, сүдү суолталаах историялаахпытын бэлиэтээн туран, кыраайы үөрэтэр туризм сайдарын туһугар күүстээх үлэ барыан наадатын эттэ. Тэрээһин кыттыылаахтара улууспут сиринэн-уотунан ааһар былыргы айан суолунан экспедицияны тэрийии уонна бу үлэ туох түмүктээх буолуохтааҕын ырыттылар. Афанасий Васильевич бырайыакка киирбит хас биирдии сир-уот историятын чинчийии, уөрэтии наадатын ыйда.
Улуус култууратын уонна Түүлээх нэһилиэгин салалталара ыытыллыахтаах экспедиция улахан суолталааҕын этэн туран, өйүүллэрин биллэрдилэр. Түмүккэ музей директора Павел Васильевич былааннаммыт бырайыак олоххо киирэригэр бары түмсэн күүстээх үлэни ыытыахха диэн ыҥырда.
