Саха автономията төрүттэммитэ 15 сылын көрсө тыа хаһаайыстыбатын ударниктарын уонна стахановецтарын республикатааҕы үһүс слеттарыгар Уус Алдан, Мэҥэ Хаҥалас уонна Амма оройуоннара сталинныы үрдүк үүнүү уонна сүөһү иитиитин өрө көтөҕүү көрүҥнэригэр социалистическай куоталаһыыга дуогабар түһэрсибиттэрэ. 1936 сыллаахха бу куоталаһыы сааскы уонна сайыҥҥы үлэлэригэр, чуолаан, бурдук үүнүүтүгэр паардааһыҥҥа, кырыс сири оҥорууга уонна от хомууругар үчүгэй көрдөрүүлэрин иһин балаҕан ыйын 10-13 күннэригэр Уус Алдаҥҥа улахан оройуон ыһыаҕа буолбута. Ыһыах тэриллэрин туһунан САССР народнай комиссардарын сэбиэтин атырдьах ыйын 29 күнүнээҕи 661 нүөмэрдээх уурааҕар көстөр.
Ыһыахха, бар-дьону түмүү сүрүн соругунан 1936 сыллаахха ылыллыбыт саҥа сталинскай Төрүт сокуон бырайыагын дьүүллэһии, күүрүүлээх үлэҕэ, стахановскай хамсааһыҥҥа, Ийэ дойду көмүскэлигэр эт-хаан, өй-санаа, байыаннай өттүнэн бэлэмнэниигэ көҕүлээһин этэ.
Ол ыһыахха кыттыыны ыла САССР обкомун иккис сэкирэтээрэ Николай Николаевич Окоемовтыын саха сэбиэскэй литературатын төрүттээччи, бэйиэт, суруйааччы, бөлүһүөк П.А. Ойуунускай, Н.Е. Мординов-Амма Аччыгыйа, С.Р. Кулачиков-Эллэй, В.М. Новиков-Күннүк Уурастыырап, А.Г. Кудрин-Абаҕыыныскай, художник П.П. Романов уо.д.а. тэлиэгэлээх атынан кэлбиттэрэ.
Ыһыах күн ыаллыы сытар Мэҥэ Хаҥаластан, Уус Алдан 25 нэһилиэгин 107 холкуоһуттан хас эмэ сүүһүнэн аттаах тыһыынчанан дьон түмсүбүтэ. Ол күннэргэ Уус Алдаҥҥа радиоузел үлэтин саҕалаабыта, саҥа оскуола дьиэтэ тутуллан аһыллыбыта, суруйар, уруһуйдуур тээбириннэр, учебниктар уонна ас-үөл атыыланар лааппылара, оборуона үлэтин көрдөрөр быыстапка үлэлээбиттэрэ. Ворошиловскай стрелок уонна ГТО нуормаларын толорууга, саха төрүт оонньууларыгар күрэхтэһиилэр ыытыллыбыттара. Оройуон үлэһиттэрэ бастакынан хаартыскаҕа түспүттэрэ, дьарапалаан көтөн кэлэн кумааҕы лиистэри үөһэттэн түһэрэн ааспыта.
Ыһыаҕы райсовет бэрэссэдээтэлэ Михаил Николаевич Пестряков аспыта, тылы П.А. Ойуунускайга биэрбитэ. «Хас эмэ тыһыынчанан киһи түмсэн баран, бырдах саҥата иһиллэр уу-чуумпутун үйэлээх сааспар арай онно истэн турабын. Хор, оннук бар дьон болҕомтотун түмэ тардар кэрэ-чуор куоластаах, уус-уран тыллаах, уоттаах-төлөннөөх араатар эбит этэ. Холкутук, биир тылы хос эппэккэ, хааһахтан хостоон этэн-тыынан, кэпсээн-ипсээн күлүмүрдүү турара өйбөр-сүрэхпэр күн бүгүҥҥүгэ диэри баар курдук», диэн Уус Алдан ытык олохтооҕо Василий Прокопьевич Готовцев ахтыытыгар суруйбут. Дьон-сэргэ кини этиитин утаппыттыы умсугуйан, күнү-дьылы аахсыбакка истибиттэр. Икки атах сөҕүөн сөҕөр, астыныан астынар уоттаах тыллаах Былатыан Ойуунускайы оройуон үлэһит дьоно иннилэригэр уктан олорон, бэйэтин илэ көрөн, саҥатын чуо истэн олуһун астыммытар.
Көмүс күһүн кэлбит хатыҥ сэлэ ортотугар төбүрүөннээн олорор бар-дьон иннигэр туран Платон Алексеевич Уус-Алдан үлэһиттэрин эҕэрдэлээн үлэһит норуот кыһыл былаахтаах трибунатын үрдүттэн эппит тылларын “…Эһиэхэ үйэ саас тухары туттарыллыбыт бу сиргэ дьоллоох олоруҥ, айымньылаахтык үлэлээҥ” диэн түмүктээбитэ.
“Ойуунускайы көрдүбүт, тыл этэрин уонна хоһоон ааҕарын иһиттибит”, — диэн оччотооҕу тыа дьоно үөрэ-көтө киэн тутта кэпсээбиттэрэ күн бүгүнүгэр диэри үгүс көлүөнэ ыччаттарын сомоҕолоһууга, кыайыылаах үлэҕэ, бэриниилээх буолууга холобур буолар. Ойуунускай бэйэтин төрөөбүт норуотугар тыыннааҕар даҕаны күндүтүк санатара билигин, биһиги кэммитигэр даҕаны арылыччы көстөр.