1932 с. муус устар 6 күнүгэр Уус-Алдан оройуонун Түүлээх нэһилиэгэр төрөөбүтэ. Түүлээх 7 кылаастаах, Мүрү орто оскуолаларын кэнниттэн 1951 с. Дьокуускайдааҕы педагогическай институт историко-филологическай факультетыгар үөрэммитэ. Орто Халыма Өлөөкө Күөл, Нам улууһун Хамаҕатта орто, саха-французскай оскуолаларыгар үлэлээбитэ. «Алдаҥҥа» диэн бастакы хоһооно оройуонун хаһыатыгар 1946 с. бэчээттэммитэ.
Оҕолорго мындыр остуоруйалары, мөкү көстүүлэри саралыыр үгэлэри, хоһооннору, өйү сайыннарар тыл оонньууларын, ырыалары суруйар. Нам улууһун «Өрөгөй ырыатын» ааптара.
Орто Халыма, Нам улуустарын, Бастакы Хаҥалас, Хамаҕатта, Түүлээх (Уус Алдан) нэһилиэктэрин ытык олохтооҕо, СӨ үөрэхтээһинин ытык бэтэрээнэ, Учууталлар учууталлара, РФ үөрэҕириитин туйгуна. Саха сирин суруйааччыларын сойууһун кыттыылааҕа.
2019 с. сэтинньи ыйга Хамаҕаттаҕа өлбүтэ.
Кинигэлэрэ:
• Мороду моргуора, 1993.
• Тууһут тураах, 2000.
• Олоҕум аргыстара, 2006.
• Азбука, 2007.
• Оторой-моторой оҕолор, 2007.
• Оҕо-оҕо эрдэххэ, 2013.
