Олунньу 1 күнүгэр улуус түмэлигэр историк учуутал, энтузиаст-кыраайы үөрэтээччи Геннадий Дмитриевич Пестряков кинигэтин билиһиннэрии тэрээһинигэр биир дойдулаахтара, үөрэнээччилэрэ, биир санаалаах үөлээннээхтэрэ кэлэн ыалдьыттаатылар. Геннадий Дмитриевич кыраайы үөрэтиигэ үгүс сыллар устата ыыппыт дьоһуннаах үлэтин «Төрүт өбүгэлэрбит суолларынан» диэн быыстапка сырдатта. Кини сыралаах үлэтин түмүгүнэн 2023 сыллаахха тахсыбыт «Айан уруоктара» кинигэтин тула түмэл сотруднига Александр Сивцев ырытыы оҥордо. Тэрээһин биир бэлиэ түгэнинэн Сэһэн Ардьакыап аатынан улуус түмэлэ олохтообут «Краевед-энтузиаст» бастакы нүөмэрдээх удостоверениелаах түөскэ кэтэр знагы директор Пермяков Павел Васильевич дохсун ытыс тыаһынан Геннадий Дмитриевичка туттарыыта буолла.
Ыҥырыылаах ыалдьыттар: И.В. Пухов аатынан Окоемовка оскуолатын директора Васильев Никита Борисович, Россия суруналыыстарын сойууһун чилиэнэ Копырин Афанасий Иванович, кыраайы үөрэтээччи Бережнев Роман Яковлевич, Мүрү 1 нүөмэрдээх орто оскуолатын педагога, суруналыыс Сыроватская Елена Николаевна, С.С. Васильев — Борогонскай аатынан киин библиотека кыраайы үөрэтэр салаатын сэбиэдиссэйэ Павлова Ольга Николаевна, улуус үөрэҕин салалтатын специалиһа Сыроватская Ирина Петровна үтүө тыллаах баҕа санааларын, кыраайы үөрэтии курдук сыралаах үлэҕэ оҕолору угуйбут учууталга, Геннадий Дмитриевичка анаатылар, махтал суруктары туттардылар 
Энтузиаст-кыраайы үөрэтээччи Пестряков Геннадий Дмитриевич айар-тутар үлэтэ өрүү таһаарыылаах, үтүө түмүктэрдээх, кэлэр көлүөнэ ыччакка үтүөнү-кэрэни түстүү турдун диэн баҕа санаабытын этэбит.
