1946 сыллаахха олунньу ый 7 күнүгэр Уус-Алдан улууһугар Дүпсүн нэһилиэгэр төрөөбүтэ. Саха государственнай университетын историко-филологическай факультетын үөрэнэн бүтэрбитэ. Василий Босяк айар үлэнэн 1964 сылтан дьарыктанар. Ити сыл «Эдэр коммунист» хаһыакка кини хоһоонноро тахсыбыттара. II-с «Азия оҕолоро» спортивнай оонньуулар гимнин автора.
Филологическай наука доктора, литературовед Николай Тобуруокап поэт Василий Босяк туһунан маннык суруйбут: «Биллэн туран, киһи поэзияны атын атыннык өйдүүр, ким хайдах олоҕу билэриттэн, литература туһунан өйдөбүлэ төһө киэҥиттэн, бэл авторга хайдах сыһыаннаһарыттан ити тутулуктаах. Ол да буоллар «Уолукпар оргуйар санаалар» кинигэ строкалара ханнык да ааҕааччы сүрэҕэр тиийиэхтэрэ, өйдөнүөхтэрэ. Тоҕо диэтэххитинэ, Василий Босяк хас биирдии киһи олоҕор хаһан эрэ билбит, умнуллубаттык долгуппут түгэннэрин туһунан элбэхтик суруйар. Саха норуодунай поэта Иван Гоголев саамай сөпкө бэлиэтээбитин курдук: «Күүтүү эрэйэ, көрсүһүү үөрүүтэ, күнүүлээн мунаахсыйан да ылыы, хойутаан баран таптал кыыма күлүм гыммытыттан муҥатыйыы, бэйэни да сэмэлэнэн ылыы — барыта ис киирбэхтэр». Василий Босяк итини барытын үгүс атын поэттардааҕар күүстээхтик, уратытык туойбут поэт. Кини сырдык тапталга, кимэ этиллибэт да буоллар, Кэрэ Дьахтарга сүгүрүйүүгэ олоҕун анаабыт киһи буолара хоһоонноруттан көстөр. Кырдьыга да хайдахтаах курдук күүстээх тапталтан:
«Кэллэххинэ эрэ сатаныыһы
Оччоҕо эрэ олох салҕаныыһы», — диэн, эбэтэр:
«Эйигинэн эрэ тыыннаах
Сылдьар эбээт бу муҥнаах» — диэн строкалар үөскээбиттэрэ буолуой?!
Василий Босяк аҥардас айар үлэ үөрүүтүнэн, дьолунан олорор киһи буолара:
«Мин бүгүн табылынным
Хоһооммор биир тылы буллум», — диэбититтэн көстөр. Онтон муҥутуур баҕатын:
«Айан үөскэппит
Аар айылҕам!
Киһи буолар кэскили
Кэрэйбэт буоллаххына,
Кулу дуу — тыл илбиһинэ».
Василий Босяк 2008 сыллаахха муус устар ый 29 күнүгэр өлбүтэ.
Кинигэлэрэ:
- Дьылҕам дьолтон матарбатар: Кутаа тула хомуурунньук, 1983;
- Угуйар саҕах. — Дьокуускай, 1988;
- Барыта эйиэхэ ананар: Хоһооннор. — Бороҕон, 1992;
- Эн мичээриҥ = Твоя улыбка = Ton sourire: Лирические стихи. — Якутск, 1995;
- Уолукпар оргуйар санаалар: Хоһооннор, поэмалар. — Дьокуускай, 1996;
- Суруллубут суоруллубат: ыстатыйалар, этиниилэр, ахтыылар. — Дьокуускай, 2001.