Муниципальное казенное учреждение "Усть-Алданский историко-краеведческий музей им. Сэһэн Ардьакыап" муниципального района "Усть-Алданский улус (район)"

Тарскай Григорий Семенович (30.01.1908-08.09.1982) — тылбаасчыт, библиограф, литературнай критик.

1908 сыллаахха тохсунньу 30 күнүгэр Дүпсүн улууһун Бастакы Өспөх нэһилиэгэр төрөөбүт. Дьокуускайдааҕы советскай-партийнай оскуоланы бүтэрбит. 1931-1933 сылларга Иркутскайдааҕы педагогическай институтка үөрэммит. Райисполком сэкэрэтээринэн, бэрэссэдээтэлинэн, «Эдэр большевик» хаһыат эрэдээктэринэн, Дьокуускайдааҕы кинигэ кыһатын уонна араадьыйа биллэрэр-иһитиннэрэр Кэмитиэтин эрэдээктэр-тылбаасчытынан, «Кыым» хаһыат эрэдээксийэтин тылбаас салаатын сэбиэдиссэйинэн, А.С. Пушкин аатынан Дьокуускайдааҕы бибилитиэкэҕэ 21 сыл устата — библиограбынан, дириэктэри солбуйааччынан, дириэктэринэн уонна тэҥҥэ кыраайы үөрэтии салаатыгар сэбиэдиссэйинэн үлэлээбит.

Г.С. Тарский саха тылыгар А. Арсеньев «Дерсу Узала», М. Горькай «Детство» («Оҕо саас»), «Дело Артамоновых» («Артамоновтар дьыалалара») уо.д.а., Л. Толстой «Кавказский пленник» («Капкаас билиэннигэ»), И. Тургенев «Записки охотника» («Сааһыт суруктара»), «Бежин луг» («Бежин мэччирэҥэ»), А. Чехов «Человек в футляре» («Хаалаах киһи»), М. Шолохов кэпсээннэрин, Р. Киплинг остуоруйаларын, Р. Роллан «Жан Кристофф» айымньыларын тылбаастаабыта.

Библиография кинигэлэрин ааптара, ол иһигэр: «Русская художественная литература в переводе на якутский язык», «Русские писатели о Якутии», «Русская художественная литература Якутии за 25 лет», «П. Черных-Якутский». Ону таһынан «Летопись печати Якутской АССР», «Календарь знаменательных и памятных дат», «Писатели Восточной Сибири» диэн ыйынньыктары таһаарыыга кыттыбыта. А. Абаҕыыныскай айар үлэтин сырдатар ыстатыйалары суруйбута.

ССРС суруналыыстарын уонна суруйааччыларын сойуустарын чилиэнэ, САССР култууратын үтүөлээх үлэһитэ. СӨ култууратын министиэристибэтин уонна өрөспүүбүлүкэтээҕи бибилитиэкэ «Бочуот кинигэлэригэр» киллэриллибитэ.

%d такие блоггеры, как: