2024 с. ахсынньы 11 күнүгэр Саха Өрөспүүбүлүкэтин норуотун хаһаайыстыбатын үтүөлээх үлэһитэ, педагогическай үлэ бэтэрээнэ, рационализатор, суруйаччы, Уус Алдан улууһун бочуоттаах олохтооҕо МИХАИЛ НИКОЛАЕВИЧ ТРОЛУКОВ төрөөбүтэ 100 сылыгар аналлаах быыстапка арыллыбыта.
Михаил Николаевич 1924 сыллаахха сэтинньи 6 кунугэр Уус-Алдан улууhугар Хорбут диэн кыракый алааска күн сирин көрбүтэ. 1942 с. атырдьах ыйыгар Кыһыл Армия кэккэтигэр ыҥырыллыбыта. Фроҥҥа Керченскэй тумус арыыга 1943 сыл ахсынньыга тиийэн, 18-с Отдельнай Приморскай Армия, 383-с стрелковай дивизиятын, 691-с стрелковай полкатын састаабыгар, бастаан танканы ытар сааланан (ПТР), онтон автоматчик быһыытынан сэриигэ кыттыбыта. 1944 сыл тохсунньу 17 күнүгэр буолбут Безымяннай сопка иһин кыргыһыыга ыараханнык бааһыран, саллааттар кэккэлэриттэн туораабыта.
1.12.1049-30.12.1950 Райкомол бюротун уурааҕынан Дьокуускайдааҕы тутуу маастардарын биир сыллаах оскуолатыгар үөрэммитэ.
Үлэтин кэрчиктэрэ:
- 2.01.1951-15.04.1954 Уус-Алдан Райисполкомун тутууга отделын сэбиэдиссэйэ;
- 15.07.1954-26.10.1964 Рай. Промкомбинакка электригэ, механига, столярнай сыах маастара;
- 16.11.1964-1.09.1965 Мүрү орто оскуолатын мастерскойун сэбиэдиссэйэ;
- 1.09.1965-13.09.1979 Мүрү орто оскуолатыгар үлэ уруогун учуутала;
- 31.08.1990-01.07.1991 Уус-Алдан оройуонун инбэлииттэрин правлениятын председателэ.
Промкомбинакка үлэлиир сылларыгар ыар, түбүктээх үлэни чэпчэтэр, судургутутар, материалы кэмчилиир уонча рационализаторскай этиитэ (саҥа технологияны) олоххо киирбитэ. Ол туһунан бэйэтэ маннык кэпсиир: «1963 сыллаахха комбинатка толору нагрузканан үлэлии сылдьан, тыа хаһаайыстыбатыгар от кырыымчык дьылыгар сүөһүнү кыһынын сылаас уунан уулатар наада диэн айбыт, аһара боростуой установка проегын айан биэртим. Бу патриотическай санаабыттан тахсыбыт этиим — «Сылаас ойбонум» республика үрдүнэн киэҥник туһаныллан тарҕаммыта. 1963 с-ҕы харчынан 1.7 мөлүйүөн солкуобайдаах барсы киллэрбитин суутунан (3 сыл устата туһата суох эрэйгэ тэбиллибитим) быһааттарбытым («Кыым» хаһыат 11.02.1965 с. «Мөлтөөбөт мөккүөр», 23.08.1966 «Үчүгэйи өйдүүр үгэстэниэххэ»). Үҥсүһэн экспертиза, икки суут көмөтүнэн кырдьыкпын булан сокуонунан көрүллүбүт 5000 солк. уонна гонорарбын ылан турабын. Мин чертежпын сылаас ойбону оҥотторбут дуоһунастаах киһи, онно тыа хаһаайыстыбатын Научнай чинчийэр института хос түһэн, авторствотын былдьаһан эрэйдээбиттэрэ! Мин хомуйуубунан 550-ча сылаас ойбон үлэлээбитэ. Онтон Тыа хаһаайыстыбатын министерствота 350-нин эрэ билиммитэ. Сылаас ойбону биһирээн Советскай Союз алта араас сурунааллара бэчээттээбитэ”.
Пенсияҕа тахсан иллэҥсийэн баран алта уон сааһыттан суруйууга холонон, араас хаһыаттарга сүүсчэкэ новелланы, ыстатыйаны, публицистиканы бэчээттэппит.
- Дууһам кырадаһына (Бичик 1991 с.)
- Көһөҥө көмүс (Бичик 1994 с.)
- Ытык мааны кырдьаҕастар (Бичик 1995 с.)
- Дьэҥкир муостаах кистэлэҥэ (Бороҕон типография 1999 с.)
- Бастар бараммат барҕа баайым (бу суруйуутун кэнниттэн Бичиккэ 2007 с. тахсыбыта)
- «Айар тутар абылаҥ» диэн бэйэтин суруйууларынан кинигэтин төрөөбүтэ 100 сылыгар анаан «Мүрү саһарҕата» издательствоҕа 2024 с. бэс ыйыгар бэлэмнээн кыыһа Ольга Михайловна Татаринова таһааттарда.