Олунньу ый 19 күнүгэр улуус историятын музейыгар өбүгэ дьиэтигэр саха тылын, суругун-бичигин декадатынан оскуола оҕолорун икки ардыларыгар хамаанданан интелектуальнай күрэхтээх тэрээһин буолан ааста.
Тэрээһин арыллыытыгар музейбыт директора Белолюбская З.М. сахалартан бастакы тыл үөрэхтээҕэ, ученай-лингвист Семен Андреевич Новгородов олоҕун чахчыларын туһунан кэлбит ыалдьыттарга, кыттаачы оҕолорго сырдатта.
Барыта 5 хамаанда кыттыыны ыллылар: Мүрү 1-кы нүөмэрдээх оскуолатыттан икки хамаанда (сал. Бурцева Л.В., Гаврильева Д.Д.), Мүрү 2-с нүөмэрдээх оскуола хамаандата (сал. Неустроева Е.И.), Мүрүтээҕи Уолан гимназия хамаандата (сал. Андросова Р.В.) уонна Мындааба орто оскуолатын хамаандата (сал. Березкина М.Н.). Дьүүллүүр сүбэҕэ кыттыыны ыллылар улуустаа5ы культура управлениетын начальнигын солбуйааччыта Павлова Л.С., кыраайы үөрэтээччилэр Алексеева Т.И., Бережнев Р.Я. уонна улуустааҕы оҕо-ыччат дьиэ-кэргэнинээн ааҕар киинин библиотекара Гоголева Н.В.
Оонньуу хаамыыта уопсайа 5 түһүмэҕинэн ыытылынна, манна сүрүннээн улууспут историятыттан, өбүгэлэрбит туттубут малларыттан, иһиттэриттэн- хомуостарыттан боппуруостарга хоруйдаатылар, өс хоһооннорун салҕаатылар, таабырыннары таайдылар, сахалыы уус-ураннаан ааҕыыга илин-кэлин түһүстулэр. Ол курдук тыҥааһыннах киирсии түмүгүнэн кыайыылаах үрдүк аатын Мүрү 1-кы нүөмэрдээх оскуолатын «Күнчээнэ» хамаандата сүктэ.
Күрэх кэнниттэн тэрийээччилэр, дьүүллүүр сүбэ кыттыбыт хамаандаларга бэйэлэрин түмүк тылларын, баҕа санааларын эттилэр. Чуолаан педагогическай үлэ бэтэрээнэ Алексеева Т.И. улууспут оскуолаларыгар төрүт култуураны үөрэтиигэ улахан болҕомто уурулларыгар баҕарда.
Бары кыттыбыт хамаанда оҕолоругар, салайааччыларыгар, дьүүллүүр сүбэҕэ музей үлэһиттэрин аатыттан барҕа махталбытын тиэрдэбит.