Сахалар уоттаах сэриигэ кыттыыларын историятын дириҥник уонна кырдьыктаахтык суруйбут историк учуонай Дмитрий Дмитриевич Петров быйыл төрөөбүтэ 100 сылынан “Историк Победы” диэн төгүрүк остуол ыытылынна. Тэрээһин сүрүннээн Дмитрий Дмитриевич уола Панкратий Петров аҕатын бэчээккэ тахсыбатах сэдэх, кистэлэҥ директиваларга олоҕурбут үлэлэрин түмүгүнэн 2015 с. таһааттарбыт “Достояние истории” кинигэтин тула ырытыһыы буолла.
Төгүрүк остуолу улуус түмэлин научнай сотруднига Белолюбская Зоя Михайловна иилээн-саҕалаан ыытта. Тэрээһин “Уус Алдан улууһа” МТ баһылыгын солбуйааччы Борисов Михаил Васильевич, Баатаҕай нэһилиэгин баһылыга Белолюбскай Михаил Михайлович, Курбуһах нэһилиэгин баһылыгын солбуйааччы Бурнашев Владимир Сестикович тыл этиилэринэн саҕаланна.
Ону таһынан, улуустааҕы “Мүрү саһарҕата” хаһыат корреспондена, суруналыыс Копырин Афанасий Иванович, улуустааҕы кииннэммит библиотека тиһигин кыраайы үөрэтэр салаатын сэбиэдиссэйэ Павлова Ольга Николаевна, историк-краевед, музеевед Сокольникова Акулина Степановна, историк-краевед, Окоемовка оскуолатын история учуутала Пестряков Геннадий Дмитриевич, историк, Тандатааҕы түмэл сотруднига Черноградская Матрена Петровна, историк, Баатаҕай оскуолатын историяҕа учуутала Готовцев Алексей Алексеевич, историк, улуус түмэлин сотруднига Сивцев Александр Петрович, Баатаҕай нэһилиэгин библиотекатын сэбиэдиссэйэ Пермякова Августина Петровна тыл этэн санааларын үллэһиннилэр. Ол курдук, инникитин улууска Петровскай диктаннары, ааҕыылары тэрийии, “Саха саллааттарын фроннааҕы суолларынан” диэн ааттаах экспедициялары ыытыы үлэлэр былааннаахтык баралларыгар ыҥырдылар. Опыттаах учуутал Акулина Степановна оскуолаларга кыраайы үөрэтии чаастара элбииллэригэр баҕа санаатын эттэ.
Тэрээһиҥҥэ Дмитрий Дмитриевич уола политологическай наука доктора Юрий Дмитриевич ыыппыт матырыйааллара сырдатылыннылар. Уһулуччулаах учуонай саха норуотун трагедиятын уонна өрөгөйүн – сэрии тематын сырдаппыта сүрүннүүр научнай үлэ быһыытынан үйэлэргэ туһанылла, сырдатылла туруохтара.
Төгүрүк остуол кыттыылаахтарыгар барҕа махталбытын тиэрдэбит.
