Муниципальное казенное учреждение "Усть-Алданский историко-краеведческий музей им. Сэһэн Ардьакыап" муниципального района "Усть-Алданский улус (район)"

«Уран тыл түһүлгэтэ»

Ханнык баҕар айымньы — олоххо баартан ылыллан суруллубутун иһин, кини тута өйдөммөт, таайтарар этиилээхтэр. Олох итэҕэстэрин холобурдаан кэпсэнэн туоратар, олох кэрэтин үллэстэн, сырдыгы иҥэрэр санаалаах ис тутуллаах буолаллар.
Суруйааччы — дьону, олоҕу эрэ билэр буолбакка, кини ис санаатынан барыны чугастык ылынан ис эйгэни билэр, өйдүүр. Кини сүрүннээн олох кырдьыгын суруйан, дьон уйулҕатын таарыйан, үөрүү буоллун, хомолто буоллун харах уутун таһаарар айылгылаах буолар.

Кулун тутар 10 күнүгэр түмэлбит «Уран тыл түһүлгэтэ» тэрээһиммитин — төрөөбүт Суоттутугар үлэлии-хамныы олорор, театр эйгэтигэр дьүһүн кубулуйан, бөрүө тутан киирбит, билигин айар-тутар умсулҕаныгар сылдьар, 2019 сыллаахха СӨ суруйааччыларын сойууһугар ылыллан, улууспутугар суруйааччы ахсаанын элбэппит — драматург, суруйааччы Иннокентий Петрович Попов-Оҕуруоттаах «Олох кэрэҕин, тыйыскын даҕаны…» улуустааҕы «Мүрү саһарҕата» хаһыат таһааттарбыт саҥа кинигэтин сүрэхтэниитигэр анаатыбыт.
Иннокентий Петрович, улуустааҕы көр-күлүү «Күлүү — сүрэх эмчитэ» күрэҕин хас да төгүлүн «Бастыҥ ааптар», «Хомоҕой тыллаах ыытааччы» анал ааттарга тиксибитэ. СӨ «Дьээбэрэҥ» күрэҕин 3 төгүллээх кыайыылааҕа, хас да төгүлүн «Сытыы бөрүө», «Кэпсэтии жанрын маастара», «Бастыҥ ааптар», «Бэртээхэй бэтиэхэ», «Хомоҕой тыл хоһууна» анал ааттары ылбыта. Өрөспүүбүлүкэтээҕи «Көр-күлүү кустуга» уус-уран суруйуу күрэҕин дипломана, «Көөчөөн көрө» народнай театр «Күһүҥҥү күллэрэҥ» күрэҕэр «Хомоҕой хоһуйуу» (бастыҥ айымньы) анал аакка тиксибитэ.
СӨ народнай театрдарын көрүүгэ иккитэ «Бастыҥ эр киһи оруола», «Бастыҥ кэмиэдьийэ ааптара» анал ааттары ылбыта.
2010 с. «Бичик» кинигэ кыһата ыыппыт «Сонун сүүрээн» күрэҕэр биһирэбили, 2011 с. «Кыым» хаһыат ыыппыт кылгас пуормалаах драма күрэҕэр 2-с үрдэли ылбыта, 2015 с. «Чолбон» сурунаал ыыппыт «Аар тайҕа» уонна «Кимий диибит…» күрэхтэрин кыайыылааҕа.
Өрөспүүбүлүкэтээҕи «Уран тыл оһуордаах ыһыаҕа», «Мин суруйааччыбын» күрэхтэргэ 2-с үрдэли ылбыта.
Улуустааҕы «Куорсун» күрэхпитигэр 2015 с., 2020 с. 1-кы үрдэли, 2018-2019 сс. 2-с үрдэли эрэллээхтик ылаттаабыта.

Айымньылара «Мүрү саһарҕата», «Кыым», «Саха Сирэ» хаһыаттарга,
«Күрүлгэн», «Чолбон» сурунаалларга бэчээттэнэн тахсаллар.
Кинигэлэрэ:
2003 с. «Олох быыһын сэгэтэн»,
2010 с. «Сүрэххэ сөҥмүт сулустар»,
2013 с. «Олох талкыта»,
2019 с. Надежда Егорова-Намылылыын «Тайҕа таайыллыбатах таптала»,
2021 с. «Олох кэрэҕин, тыйыскын даҕаны…».

Уран тыл түһүлгэбитигэр улуустааҕы «Мүрү саһарҕата» хаһыат сүрүн эрэдээктэрэ Н.Г. Попова, Суотту библиотекатын салайааччыта Р.Н. Черкашина кыттыыны ыллылар. Тэрээһиммит быһа биэриинэн көһүннэ. Ааҕааччылар истиҥ санааларын үллэстибиттэрин ааҕыынан үөрүүлээх тэрээһини түмүктээтибит.

%d такие блоггеры, как: